1st Thread.. & It is dedicated to my late brother Nauman..!

Hmmz.. As a muslim we don’t have this things in our religion.. things i mean Barsi, Birthday.. and all.. but the days make us remember each and everything.. is din is waqt yeh howa.. hum yahan they.. 14th july bhi aik aisa hi din hai.. jis din yeh duniya chor ker mere bhai jaan ne asli duniya chunn li.. yeh Allah Tala ki marzi hai aur hum us ke bandey.. us ki har baat per sar taslim-e-khum kerdena hi humara shiwa hai.. laiken aik arsa jis shaks ke sath app rehte ho.. woh aik had tak app ki kull kaynaat ban jayen tu dukh tu hoga hi.. dukh apni jagah Allah Tala ki marzi apni jagah.. us ke aghey hum beybus hain hum usi ki amanat hai aik roz usi ki taraf palat ker jaye gen.. koi jaldi jaye ga koi dair se.. laiken jana sab ne hai.. laiken hum un guzrey howey palon ka kia karen? kahan dafan kerden un ko? aik lamhey mein duniya bikhar si gayei hum logon ki.. han woh aik lamha hi tha.. woh tu theek hochukey they.. ghar aney waley they.. phir aik dam se? han aik dam se Allah Tala ne apne bandey ko upper bulaya lia.. ab tak yakeen nahi ata.. Aik lamhey mein woh hum sab ko chor ker chaley gen.. 18 saal ka sath chor dia.. sab rishte natey chor ker.. jis kaam se unhey mohabbat thi us ko chor ker.. aisey gaye jaise koi yahan tha hi nahi.. kia nahi tha un ki life mein, kia nahi kia unhoney hum family members ke liye? sab kuch!! apna sab kuch hum per laga dia.. aur moqa bhi nahi dia ke hum un ka theek se shukria hi ada kersaken.. har aik ki khuwahishaat hoteen hain un ki bhi thi.. aik motor bike aur internet.. laiken dono hi un ki dastarass se bahir tha.. phir bhi shikwa nahi kia kabhi gila nahi kia.. kia khobi unhoney nahi pai thi? jo kaha woh howa.. jo manga woh mila.. har dukh mein paish paish.. har cheez mein paish paish.. behan ki shadi, bhai ki birthday, behan ki farmaish.. sab kuch tu honey ne kia.. per kia tha jo aik moqa mil jata hum bhi kuch kerlete un ke liye.. Shayad Allah apne naik bandon ko hi jald bula leta hai.. woh bhi naik they har cheez behan bhai aur family ke liye ki.. kabhi apnay barey mein nahi socha.. apni takleef ko nahi dekha..

Kitne shoq se bhai ki birthday ki shopping ki.. shoes le ker apni pasand ki kachoriyan le ker ghar ayen aur kaha ammi se ke ab Salman ko le jayen aur pant shirts le ayen aur bhai se kaha ke aik number bari lena ta ke mein bhi use kersakon.. sab kuch aya.. sab kuch wohi jo unhoney kaha.. pant shirt shoes sab kuch laiken pehnna naseeb na howa.. 24th june ko leen gayein cheezain 14th july ko moun cheera raheen theen…. Bhai ko school se uthwa lia kion ke asthma tha aur woh nahi chahte they ke bhai per burden ho.., behan ki shadi ka zyada se zyada kharcha khud uthaya.. composing kerte log atey kabhi koi shikayat nahi mili logon ki.. hospital mein bhi keh rahey they ke phone la do mein ne client ko phone kerna hai.. kabhi apna kaam kal per nahi tala.. itni si umer mein kia nahi dekha aur konse dukh nahi jhailey? laiken kabhi jo unhoney aik Ufff bhi kaha ho.. kitney naik hote hain aise log.. aur kitni jaldi chor jate hain.. yahan intezar horaha hai ke poore aik din bad bhai ghar wapis arahey hain aur woh aye zaroor.. magar strechter per.. aur aye zaroor per hamesha ke liye janey ke liye..

Na hum ne apne Rab se shikwa kerna seekha hai aur na hi karey gen, us ki merzi ke aghey humari kia ookaat?

I hope ke app log mere bhai aur meri family ko duaon mein yaad rakhen gen.. Allah app sab ko apne hifz-o-aman mein rakhen Ameen.

Take Cares, Allah Hafiz
-Ayesha

7 thoughts on “1st Thread.. & It is dedicated to my late brother Nauman..!”

  1. Dearest Sweetest Cutest Ayesha Baji,

    Jo aata hai beshaq ussay challay jana hota hai. I know u miss him alot per is tarah soachnay say aap apnay aap ko dukh daiti ho na. Aur jo aap say itna piyar kertay rahay agar unhain pata challa keh un ki choti si pari peraishan hai to he will feel so helpless. So aisay nahi soachtay. Its good that he is not here, is duniya say agli duniya to bohatttttttttt achi hai. Yahan to imtehan hai and as u say woh bohat achay they, so u should be proud of him. Allah apnay bandoN aur us ki mehnat ko kabhi raigaaN nahi janay daita. Woh to mazay mei hongay then why do u keep trying to hurt him. Is tarah soach ker is tarah likh ker u r hurting urself. Meri jaan si guria, woh inshaAllah hum sab ki duaoN mei rahaingay aur yehi to unhain chaheeye. He is lucky keh woh humain peechay chore ker gay, haina na? Baaqi.. thora aur intezar phir hum sab team bananay wallay haiN na 🙂 :). Aap un ki team mei hogi keh meri :$? Aaannn nahi na please.. mei ab nahi dantoonga, join mine :(. Sahee hai bachoo, yeh saath bas yaheen kay liye hai :@?

  2. Allah tala apkay bhai ko janat naseeb karay or itnay saray achay kamon ka ajar day.

    Or Ayesha Allah apko Sabar day.

    Bas yaar or samajh nahi arahi kya kahon .Dil hai kay bhari ho gaya hai or ankhein bhar aye hein..

    Allah tala apki family ko hamesha aik dosray say qareeb rakhay or kabhi koi gham na aye aap logon ki zindagi main.

  3. Thanks so much Fouzia for the prayers, for the comments and for being there to cheer me up 🙂

  4. main koch likhana chata tha mager likh nehi pa raha…

    yeh wo batian hain jo app na hazar bar suni honge…

    bass itne duua ha Allah apko sabar ata kera or app ka bahi ko janat main jagha de.Ameen

  5. Asalamalikum, i hope u will be fine, buhat deer baad app ka page visit kiya magar jaan ker dukh howa k app ka brother ub iiss duniya mein nahi hain, May God rest his soul in Peace. Duniya tu sirf aik stage drama hay jahan her kissi nay ana hay perform kerna hay or phir chalay jana hay. kya maloom kon kub kahan kaisay chaala jaye ga. Insan kay buss mei kuch bhyi nahi hay, duniya ka system tu chalta rehta hay, kissi kay janay saay koi farq nahi perta hum sirf itna ker saktay hain kay janay walay kay liya dua kerien. Phir un ko bhi pata chalta hay kay unhein loog kitna miss kertay hain.
    (May God Rest his Soul in peace)Ameeeeeeeennnnnnnnn

Leave a Reply